Bakı, 19 mart, AZƏRTAC
Bakı Dövlət Universiteti (BDU) Əmək və Əhalinin Sosial Müdafiəsi Nazirliyinin Novruz bayramı münasibətilə başlatdığı “DOST xonçası” kampaniyasına qoşulub.
Universitetdən AZƏRTAC-a bildiriblər ki, 100 illik yubileyi ərəfəsində olan Bakı Dövlət Universiteti tənha, yaşlı insanlarla bayramlaşmaq, cəmiyyətdə onlara diqqət və qayğını təşviq etmək məqsədilə 100 xonça hazırlayıb.
BDU-nun əməkdaşları tənha, yaşlı insanlarla yanaşı, universitetin qaçqın, məcburi köçkün olan və təsərrüfat sahəsində çalışan işçilərinə də bayram xonçası təqdim edib, onları bu gözəl bayram münasibətilə təbrik ediblər.