Lənkəran, 19 mart, Bağır Əliyev, AZƏRTAC

Hər il olduğu kimi, bu il də Novruz bayramı və məktəblilərin yaz tətili günlərində Lənkəran Dövlət Dram Teatrı uşaqları yeni bayram tamaşası ilə sevindirəcək.
AZƏRTAC-ın bölgə müxbiri xəbər verir ki, martın 22-dən 25-dək teatrın səhnəsində gündə iki dəfə Tərlan Abdullayevin müəllifi və quruluşçu-rejissoru olduğu “Sehirlənmiş qız” musiqili nağıl-tamaşası nümayiş etdiriləcək.
Dostluq, mehribanlıq ideyasını təlqin edən səhnə əsərinin quruluşçu-rəssamı Tərlan Sadıqov, musiqi tərtibatçısı Fərahim Fərəcovdur.
Əsas rollarda aktyorlardan Əməkdar artist Sucəddin Mirzəyev, Qızılgül Quliyeva, Təranə Fərəcova, Aysel Cahangirova, Arzu Abbaszadə, Məleykə Cəfərova, Amil İbrahimli və başqaları çıxış edirlər.