Bakı, 18 mart, AZƏRTAC

Ənənəvi olaraq aprel ayı bütünlüklə autizm barədə məlumatlandırma işlərinə həsr olunur. Çoxsaylı aksiyalar sayəsində bütün dünyada insanlar bu inkişaf pozuntusuna diqqət yetirərək daha çox məlumat əldə edirlər. Həmçinin bu aksiyanı dəstəkləyən xeyriyyə və kommersiya təşkilatlarının sayı da ildən-ilə dəfələrlə artır ki, bu da sözügedən aksiyalara, ən əsası isə onların səmərəliliyinə olan yüksək tələbatı əks etdirir.
Aprelin 6-da Heydər Əliyev Mərkəzində Azərbaycan Respublikasının Təhsil Nazirliyinin, Heydər Əliyev Fondunun, İcbari Tibbi Sığorta üzrə Dövlət Agentliyinin və Azərbaycan Respublikasının Ailə və Qadın və Uşaq problemləri üzrə Dövlət komitəsinin dəstəyi ilə fərqli inkişaf özəllikləri olan uşaqlara həsr olunan I “Fərqli fərdlər” konqresi keçiriləcək.
Konqresinin baş tərəfdaşı qismində BP çıxış edir. Tədbir Shokki Mokki brendi, həmçinin “Halliburton”, “ACE Group Consultants”, “Art Trio”, “Credo” və “CTS Translation” şirkətləri tərəfindən dəstəklənir. Təşkilati dəstək - “Birgə və sağlam” İctimai Birliyi tərəfindən edilir.
Konqresin təşkilatçıları qismində Famtram.az ailə portalı, Edutainment.az təhsil strukturu və peşəkar tədbirlərin aparıcı təşkilatçısı - “Сaspian Event Organisers” (CEO) şirkəti (ceo.az) çıxış edir.
Şirkətdən AZƏRTAC-a bildirilib ki, konqresin məqsədi ictimaiyyətin diqqətini fərqli özəllikləri olan uşaqların inkişafına və təlim-tərbiyəsinə yönəldərək valideynlər, mütəxəssislər və pedaqoqlar arasında dialoq qurmaq və inklüziv cəmiyyətin dövlət tərəfindən müəyyənləşdirilmiş inkişaf təmayülünü dəstəkləməkdir. Tədbirdə aşağıdakı mövzuları ehtiva edən 4 panel təqdim olunacaq: Autizm spektr pozuntusu; Diqqət çatışmazlığı və Hiperaktivlik sindromu; Turett sindromu; Daun sindromu.
Konqresin məruzəçiləri arasında tanınmış beynəlxalq və yerli mütəxəssislər, fərqli inkişaf xüsusiyyətləri olan uşaqların valideynləri, eləcə də öz həyat və nailiyyət tarixçələri barədə danışmaq istəyən insanlar yer alır. Konqresdə, həmçinin dövlət strukturları, müəllimlər, həkimlər və fərqli inkişaf özəllikləri olan insanlar ilə iş üzrə mütəxəssislər iştirak edəcəklər.
Hazırda tədbirdə çıxış edəcək iştirakçılar arasında klinik psixoterapevt Natalya Yaroşenko (İsveç), Beynəlxalq Disleksiya Mərkəzinin rəhbəri psixoloq Lora Zakon (İsrail), “Daunsayd Ap” Xeyriyyə Fondu nəzdində Təhsil Mərkəzinin direktoru Yelena Pol (Rusiya), Daun Sindromlu Şəxslərin Reabilitasiya Mərkəzinin müdiri Natella Həsənova (Azərbaycan) var.
İnkişaf özəllikləri olan uşaqların öz normotipik həmyaşıdları ilə təhsil alması həyati əhəmiyyət kəsb edir və sevindirici haldır ki, Azərbaycanda belə uşaqlar dövlət qayğısı ilə əhatə olunub. Azərbaycan Respublikasının Prezidenti İlham Əliyevin 2013-cü il 24 oktyabr tarixli Sərəncamı ilə “Azərbaycan Respublikasında təhsilin inkişafı üzrə Dövlət Strategiyası”nın qəbul edilməsi ölkədə inklüziv cəmiyyətin inkişaf etdirilməsi baxımından yeni imkanlar yaradıb.
Konqresdə iştirak etmək üçün linkdən (https://ferqliferdler.az/az-home.html) istifadə edərək qeydiyyatdan keçib elektron biletinizi əldə edə bilərsiniz. Bununla yanaşı, arzu edən hər kəs (könüllülük əsasında) tədbiri dəstəkləyə bilər. Bütün maraqlanan şəxs və şirkətlər tərəfdaşlığa dəvət edilir ([email protected]; [email protected]).