Bakı, 16 mart, AZƏRTAC

ABŞ-ın Florida ştatındakı Kanaveral burnunda yerləşən kosmodromdan Delta IV raketdaşıyıcısı ilə Birləşmiş Ştatlar ordusu üçün nəzərdə tutulan kommunikasiya peyki kosmosa göndərilib.
AZƏRTAC CNN telekanalının saytına istinadla xəbər verir ki, raketin martın 16-da yerli vaxtla 03:26-da həyata keçirilən buraxılışı United Launch Aliance şirkəti tərəfindən canlı yayımlanıb. Delta IV raketdaşıyıcısının kosmik orbitə çatdıracağı WGS 10 peyki hərbi məqsədlər üçün daha yüksək səviyyəli rabitəni təmin edəcək.
ABŞ-ın Milli Aeronavtika və Kosmik Tədqiqatlar Agentliyinin direktoru Cim Braydenstayn bundan əvvəl Dragon 2 kosmik aparatının Beynəlxalq Kosmik Stansiyaya birləşməsini kosmosa uçuşlar sahəsində yeni mərhələnin başlanğıcı adlandırıb.