Bakı Xoreoqrafiya Akademiyasının 90 illiyinə həsr edilmiş konsert təqdim edilib
Bakı, 12 mart, AZƏRTAC
Bakı Xoreoqrafiya Akademiyası Təhsil Kompleksinin (BXA) tam orta məktəbinin şagirdləri Rəşid Behbudov adına Azərbaycan Dövlət Mahnı Teatrında akademiyanın 90 illik yubileyinə həsr olunmuş konsert proqramı ilə çıxış ediblər.
AZƏRTAC xəbər verir ki, konsert BXA-nın tam orta məktəbinin direktoru Bəşarət Hüseynovanın giriş sözü ilə başlayıb. Direktor Bakı Xoreoqrafiya Akademiyasının 90 illik tarixindən, bu illər ərzində yetişdirdiyi məşhur xoreoqraf ustadlarından, ölkəmizdə mədəniyyətin inkişafına göstərilən dövlət qayğısından danışıb: “Yarandığı ilk illərdən əsas məqsədi cəmiyyətin tərəqqisinə çalışmaq və bunun üçün də Qəmər Almaszadə, Leyla Vəkilova, Rəfiqə Axundova, Afaq Məlikova, Pulumb Aqalıyay, Təranə Muradova, Kamilla Hüseynova, Yuri Lobaçov kimi yüksək ixtisaslı kadrları hazırlamaqdan ibarət olub” - deyə B. Hüseynova qeyd edib.
B. Hüseynova Yel çərşənbəsi münasibətilə də akademiyanın kollektivini və konsertdə iştirak edən tamaşaçıları təbrik edib, hər birinə sağlamlıq, firavan həyat arzulayıb.
Daha sonra akademiyanın şagirdləri Əməkdar mədəniyyət işçisi Lyudmila Qutlyanskayanın quruluşunda A.Adanın “Jizel” baletindən Qalop, L.Delibin “Silviya” baletindən Pitsikatto, S.Raxmaninovun “Burevestnik” rəqsi, P.İ.Çaykovskinin “Qu gölü” baletindən variasiya parçalarını, Əməkdar artist Səbinə Qasımovanın quruluşunda “İnnabı”, “Güləbatın” rəqslərini, müəllim-konsertmeysterlər, o cümlədən Lalə Zöhrabbəyova, Səidə Axundova, Lalə Hüseynli, Sevda Axundova və Rəhimə Hüseynovanın şagirdləri L. Delibin “Koppeliya” baletindən Vals, R.Qlierin “Mednıy vsadnik” baletindən Polka, Ə.Bədəlbəylinin “Qız qalası” baletindən Gülyanağın rəfiqələri ilə rəqsi, Q.Qarayevin “İldırımlı yollarla” baletindən Laylay əsərlərini fortepianoda, Fazil Cəfərovun şagirdləri isə Azərbaycan ritmləri musiqili-rəqs kompozisiyasını nağarada ifa ediblər.
Xətai Sənət Mərkəzində “Müşahidələrin fraqmentləri” adlı fərdi sərgi açılıb
Haaqada UNESCO üzrə Azərbaycan Respublikasının Milli Komissiyasının 30 illik yubileyi qeyd edilib
Bakıda Qırğız Mədəniyyəti Günləri keçiriləcək
“Xalqın mədəni sərvəti” layihəsi çərçivəsində regionlarda növbəti konsert təşkil edilib
“BakuOperArt” “Sərhədsiz Puşkin” adlı ədəbi-musiqili layihə təqdim edir