Naxçıvan, 27 fevral, AZƏRTAC

Türkiyənin 13 nəfərdən ibarət alpinistlər qrupu Xocalı soyqırımını anmaq üçün Naxçıvan Muxtar Respublikasında olublar. Onlar Naxçıvanın məğrurluq simvolu sayılan Haçadağın zirvəsinə qalxaraq, Xocalı soyqırımının qurbanlarının xatirəsini yad ediblər.
AZƏRTAC-ın Naxçıvan bürosuna müsahibəsində qrupun rəhbəri, “İskəndər İqdır Ağrı Dağı Dağçılıq və Ekstremal idman növləri klubu”nun direktoru Umud Sönməz bu yürüşü Xocalı faciəsinin dünyaya çatdırılması məqsədilə təşkil etdiklərini bildirib: “Biz dost yox, qardaş ölkələrik. Sevinciniz sevincimiz, kədəriniz kədərimizdir. Bu faciə bizi sarsıdıb. Bu məqsədlə biz 1992-ci il fevralın 26-da Xocalıda baş verən soyqırımını anmaq üçün Türkiyənin müxtəlif bölgələrində yaşayan və fəaliyyət göstərən 13 peşəkar alpinistlə Haçadağa çıxmağı qərarlaşdırdıq”.
Umud Sönməz qeyd edib ki, bu, onların Haçadağa sayca 3-cü yürüşüdür.