Bakı, 14 yanvar, AZƏRTAC

Yanvarın 14-dən etibarən Azərbaycan Tibb Universitetinin (ATU) Tədris Terapevtik Klinikasının daxili xəstəliklər kafedrasında vətəndaşların ödənişsiz müayinəsi ilə bağlı aksiya başlayıb.
Universitetin mətbuat xidmətindən AZƏRTAC-a bildiriblər ki, bu həftə ərzində şöbənin bütün həkimlərinin qəbulu ödənişsiz olacaq.
Klinikanın daxili xəstəliklər kafedrasının müdiri Vəsadət Əzizovun sözlərinə görə, əsasən ürək, qan-damar sisteminin fəaliyyəti ilə bağlı problemi olan pasiyentlər müayinə ediləcək. Həmçinin daxili xəstəliklərin terapevtik aspektdən müayinəsi təşkil olunacaq.
Kampaniya yanvarın 18-dək davam edəcək.
Qəbula yazılmaq üçün əlaqə saxlamaq mütləqdir.
Ünvan: Mərdanov qardaşları küçəsi,1001-ci məhəllə, ATU-nun Tədris Terapevtik Klinikası, 8-ci mərtəbə. Telefon: (012) 441-33-18.