Azərbaycan Dövlət
İnformasiya Agentliyi

A
A
A
Sazlamalar

Qazaxıstan tələbələri Bilik Fondunun qonağı olublar

Bakı, 11 yanvar, AZƏRTAC

Azərbaycan Respublikasının Prezidenti yanında Bilik Fondunun fəaliyyət istiqamətlərindən biri də dünya elmini ölkəmizdə, Azərbaycan elmini dünyada tanıtmaqla yanaşı, “Azərbaycan əcnəbilərin gözü ilə” layihəsi çərçivəsində xarici ölkə gənclərini xalqımızın tarixi və mədəniyyəti, dövlətimizin iqtisadi və elmi nailiyyətləri barədə məlumatlandırmaqla azərbaycançılıq məfkurəsi zəminində milli-mənəvi dəyərlərimizi təbliğ etməkdən ibarətdir.
Yanvarın 11-də Qlobal Karyera İnstitutunun dəvəti ilə Qazaxıstan Respublikasının Almatı Menecment Universitetinin ölkəmizdə səfərdə olan bir qrup tələbəsi Bilik Fondunun qonağı olublar. İnstitutun direktoru Orxan Həsənoğlu Qazaxıstan universitetinin nümayəndə heyətini təqdim etdikdən, tələbələrin ölkəmizə səfərinin məqsədləri, nəzərdə tutulmuş tədbirlər barədə məlumat verdikdən sonra qonaqlar Bilik Fondunun fəaliyyəti ilə tanış olublar.
Fonddan AZƏRTAC-a bildirilib ki, icraçı direktor Oktay Səmədov rəhbərlik etdiyi qurumun yaranma tarixi, struktur bölmələri, maarifləndirmə proqramları üzrə həyata keçirdiyi layihələr, bölgələrdə fəaliyyət göstərən Bilik evlərində yerli gənclərin cəlb olunduğu təlim kursları, dərnək və klublar, Fondun beynəlxalq əlaqələri barədə söhbət açıb.
Almatı Menecment Universitetinin Qonaqpərvərlik Mərkəzi fakültəsində təhsil alan və ölkəmizə ilk dəfə gələn qazaxıstanlı gənclərə Azərbaycanın iqtisadi həyatı, turizm sahəsində uğurları, müvafiq ixtisaslar üzrə kadr hazırlığı istiqamətində nailiyyətləri barədə ətraflı məlumat verilib, onlara səfər başa çatdıqdan sonra ölkəmizlə bağlı təəssüratlarını yeni dostları ilə bölüşmək məqsədilə “Azərbaycanla ilk tanışlığım” mövzusunda esse müsabiqəsinə qatılmaq təklif olunub.
Nümayəndə heyətinin rəhbəri Dilmurad Sabirov Bilik Fondunun rəhbərliyinə və əməkdaşlarına maraqlı və məzmunlu görüşə görə minnətdarlığını bildirib, Almatı Menecment Universitetinin Bilik Fondu ilə gələcək əməkdaşlığının faydalı olacağına əminliyini söyləyib.
Qazaxıstanlı tələbələrin Fond əməkdaşları ilə dialoq şəklində baş tutmuş görüşündə hər iki ölkədə turizm və menecment ixtisasları üzrə təhsil alan, gələcəkdə orta və kiçik sahibkarlığın inkişafında imzası ola biləcək gənclər arasında işgüzar əlaqələrin yaranması, dostluq münasibətlərinin möhkəmlənməsi istiqamətində birgə tədbirlərin keçirilməsi, tələbə elmi konfransları və seminarlarının təşkili, ümumilikdə isə tələbələr arasında “bilik körpüsü”nün yaradılması ilə bağlı məsələlər ətrafında fikir mübadiləsi aparılıb.
Sonda qonaqlara Bilik Fondunun kitab hədiyyələri təqdim olunub.

Elm və təhsil 2019-01-11 17:10:00