×
A
A
A
Sazlamalar

“Azexport” portalı vasitəsi ilə Rusiyaya 60 ton qoyun yunu ixrac olunub

Bakı, 11 dekabr, AZƏRTAC

İqtisadi İslahatların Təhlili və Kommunikasiya Mərkəzinin “Azexport” portalı vasitəsi ilə Rusiyaya 60 ton qoyun yunu ixrac olunub.
Mərkəzdən AZƏRTAC-a bildirilib ki, ixracı Zaqatala sakini sahibkar Əlihüseyn Şirinli həyata keçirib. Rəsmi rəqəmlər göstərir ki, son 10 ildə Azərbaycandan Rusiyaya yun ixrac edilməyib.
l qrup əlil olan Ə.Şirinli ona uğur qazandıran “Azexport.az” portalı ilə əməkdaşlığı cari ilin avqust ayında başlayıb. Bu müddət ərzində ona potensial sifarişlər, ixrac bazarında mövcud texniki baryerlər və Azərbaycanda bütün ixrac prosedurları ilə bağlı məlumat verilib. İlk partiya məhsulunu Rusiyaya göndərən Ə.Şirinli portalla əməkdaşlığını davam etdirəcəyini və ixracın həcmini daha da artıracağını bildirib. Onun sözlərinə görə, ixracdan əldə etdiyi gəlirlə mövcud istehsal sahəsini genişləndirəcək və yeni iş yerləri yaradacaq.
Qeyd edək ki, son illər Azərbaycan Respublikasında yun istehsalı artsa da, onun ixracı ilə bağlı müəyyən problemlər qalmaqdadır. “Azexport.az” portalı isə bu ixrac prosesi ilə ölkəmizdən qoyun yunu ixracının həm həcminin artmasına, həm də ixrac coğrafiyasının genişlənməsinə töhfə verir.
“Azexport” portalının rəhbəri Zaur Qardaşov da əlavə edir ki, ixraca və ümumilikdə biznesə ölkəmizdə yaradılan şərait bu gün imkan verir ki, istək, niyyət və işgüzarlıq varsa hər kəs, hətta fiziki məhdudiyyətli insanlar da özünə yüksək gəlir mənbəyi təmin edə bilər. Yəni “Azexport” portalı hər kəs üçün bərabər imkanlar yaradır. Bundan başqa “Azexport” bir rəqəmsal platforma olaraq, sahibkarlara xarici bazara çıxmaqla yanaşı, ixrac icazələrinin alınması, logistika, marketinq və digər məsələlərdə dəstək olur. “İri biznesin bazara çıxması elə də çətin deyil, əsas kiçik və orta sahibkarların xarici bazara çıxışını təmin etməkdir ki, bu məsələ bu gün “Azexport”un fəaliyyətinin əsas istiqamətlərindən biridir”, - deyə Zaur Qardaşov bildirib.
Azərbaycan Respublikası İqtisadi İslahatların Təhlili və Kommunikasiya Mərkəzinin “Azexport.az” portalı Azərbaycan Respublikası Prezidentinin 2016–cı il 21 sentyabr tarixli “Azərbaycan Respublikasında istehsal olunan malların vahid məlumat bazasının yaradılması” haqqında Sərəncamına əsasən yaradılıb. Portal sahibkarlara ölkəmizdə istehsal olunan malların beynəlxalq elektron ticarət platformaları vasitəsi ilə ənənəvi və yeni bazarlara çıxarılması imkanlarını təqdim edir.

Biznes 2018-12-11 13:04:00