Bakı, 12 noyabr, AZƏRTAC
Mərkəzi Bank tərəfindən pul nişanlarının saxtalaşdırılmasına qarşı mübarizənin effektiv təşkili diqqət mərkəzində saxlanılıb, 2017-ci il ərzində 1322 ədəd (30 478 manat) saxta pul nişanı tədavüldən çıxarılaraq müvafiq araşdırmaların aparılması üçün hüquq-mühafizə orqanlarına təqdim edilib.
AZƏRTAC Mərkəzi Bankın illik hesabatına istinadla xəbər verir ki, hesabat dövrünün sonuna tədavüldə olan hər 163 000 ədəd kağız pul nişanına 1 ədəd saxta pul nişanı düşüb ki, bu da digər ölkələrin müvafiq göstəriciləri ilə müqayisədə əhəmiyyətli dərəcədə aşağıdır. Avrozona üzrə dövriyyədə olan hər 30 000 ədəd kağız pul nişanına 1 ədəd saxta pul nişanı düşür.
Ötən il ərzində pul nişanlarının saxtalaşdırılmasına qarşı mübarizənin effektiv təşkili məqsədilə müvafiq dövlət orqanları ilə informasiya mübadiləsini, bank sistemi üçün analitik informasiya bazasını və eləcə də nağd pul xidmətlərinə elektron çıxış imkanını təmin edən "Saxta pul nişanlarının monitorinqi sistemi" yaradılıb.
Mərkəzi Bankda nağd pul idarəetməsi yeni keyfiyyət mərhələsinə çatdırılıb, bütövlükdə bank sistemini əhatə edən və Mərkəzi Bankın digər informasiya sistemlərinə inteqrasiya olunan "Nağd pulun İdarəetmə Sistemi (CMS)" tam funksionallığı ilə fəaliyyət göstərir. Bu sistem vasitəsilə hazırda regionlar da əhatə olunmaqla Mərkəzi Bankla kommersiya bankları və poçt rabitəsinin milli operatoru arasında nağd pulla bağlı bütün əməliyyatlar real vaxt rejimində avtomatlaşdırılmış qaydada həyata keçirilir.
İl ərzində Regional Mərkəzi Bankçılığın inkişafı diqqət mərkəzində olub. Belə ki, regional mərkəzlərdə əhalinin, eləcə də kredit təşkilatlarının nağd pula olan tələbatı tam həcmdə və vaxtında ödənilib.