Azərbaycan Dövlət
İnformasiya Agentliyi

A
A
A
Sazlamalar

Turizm sənayesinin inkişaf etdirilməsi barədə müzakirələr aparılıb

Bakı, 11 oktyabr, AZƏRTAC
Azərbaycan Turizm və Menecment Universitetində (ATMU) “Turizm sənayesinin inkişaf etdirilməsi” mövzusunda tədbir keçirilib.
Universitetdən AZƏRTAC-a bildirilib ki, tədbirdə Azərbaycan Dövlət İqtisad Universitetinin (UNEC) Rus İqtisad Məktəbinin direktoru, dosent Mənsur Barxudarov, bu məktəbin direktor müavini, professor Elşad Məmmədov, dosent Şəhla Hüseynova, dosent Natiq Qurbanov və başqaları iştirak ediblər.
Tədbirdə ATMU-nun tədris işləri üzrə prorektoru İranə Əliyeva diqqətə çatdırıb ki, qeyri-neft sektorunun başlıca istiqamətlərindən sayılan turizm sənayesinin inkişafına alim-mütəxəssis səviyyəsində elmi münasibət bildirilməsi məhz dövlət statuslu bu iki universitetin birgə əməkdaşlığına vəsilə ola bilər. O, qarşıdakı illərdə ATMU və UNEC-in Rus İqtisad Məktəbinin müvafiq istiqamətdə fəaliyyətin səmərə verəcəyinə əminliyini bildirib.
M.Barxudarov rəhbərlik etdiyi məktəbin fəaliyyəti, hədəfləri barədə ətraflı məlumat verib.
ATMU-nun turizm və qonaqpərvərlik fakültəsinin dekanı Bahadur Bilalov turizm və iqtisadiyyat sahəsində nəzərdə tutulan layihələrin birgə işlənib hazırlanması təklifini irəli sürüb.
Universitetin marketinq kafedrasının müdiri Elmira Qocayeva isə tədrisin təşkili prosesində müştərək müstəvidə distant təhsil metodunun əhəmiyyətini vurğulayıb. O, təklif olunan yenilikdən müəyyən saatlarda hər iki universitetin müvafiq ixtisas tələbələrinin bəhrələnəcəyini bildirib.
ATMU-nun biznes idarəçiliyi fakültəsinin dekanı Anar Mirzəyev, marketinq kafedrasının müəllimi Günel Teymurova müştərək layihələrin əhəmiyyəti, biznes idarəçiliyi fakültəsinin dekan müavini İlahə Əliyeva isə ölkə əhəmiyyətli tədbirlərdə tələbələrin fəal iştirakları barədə fikirlərini bölüşüblər.

Elm və təhsil 2018-10-11 18:52:00