Rusiya Böyük Teatrında azərbaycanlı musiqiçilərin iştirakı ilə “Qaratoxmaq qadın” operası oynanılacaq
Bakı, 10 avqust, AZƏRTAC
Noyabrın 20-dən 24-dək Rusiya Dövlət Akademik Böyük Teatrında P.Çaykovskinin “Qaratoxmaq qadın” operası oynanılacaq.
AZƏRTAC teatrın saytına istinadla xəbər verir ki, səhnə əsərində noyabrın 20-də, 22-də və 24-də Tomskinin, habelə intermediyada Zlatoqorun partiyalarını Azərbaycanın Xalq artisti Elçin Əzizov (bariton) ifa edəcək. Həmin günlərdə German obrazında isə Azərbaycanın Xalq artisti Yusif Eyvazov (tenor) çıxış edəcək.
2008-ci ildən Böyük Teatrın solisti olan Elçin Əzizov P.Çaykovskinin “İolanta”, S.Prokofyevin “Üç portağal sevgisi”, N.A.Rimski-Korsakovun “Çar gəlini”, J.Bizenin “Karmen”, M.Musorqskinin “Boris Qodunov”, C.Verdinin “Traviata”, “Don Karlos”, A.Borodinin “Knyaz İqor” operalarında yaddaqalan obrazlar yaradıb.
Karyerasına İtaliyanın teatr və konsert zallarında başlayan Y.Eyvazov 2008-ci ildə Milanda Opera Müğənniləri Beynəlxalq Müsabiqəsinin Qran-Pri mükafatına layiq görülüb. O, 2012-ci ildə Bakıda Vokalçıların Bülbül adına VI Beynəlxalq müsabiqəsinin qalibi olub. Y.Eyvazovun adı “Dünyanın ən yaxşı tenorları” kitabında yer alıb.
Teatr forumunun vaxtı dəyişdirilib
“Azərbaycan sənədli kino salnaməsi” çərçivəsində növbəti tədbir
Operasevərlər üçün “Bohema” növbəti dəfə