Bakı, 21 avqust, AZƏRTAC 

Avqustun 21-də Azərbaycan Tibb Universitetinin (ATU) rektoru, professor Gəray Gəraybəyli ATU-da tələbələrin qeydiyyat prosesinin gedişi ilə tanış olub.
ATU-nun mətbuat xidmətindən AZƏRTAC-a bildiriblər ki, abituriyentlər və onların valideynləri ilə söhbətdə G.Gəraybəyli qeydiyyat zamanı yaranan çətinliklərlə maraqlanıb, prosesin daha da sürətləndirilməsi üçün müvafiq məsləhətlərini verib.
Qeyd edək ki, qeydiyyat prosedurunda lazım olan sənədlərin siyahısı əvvəlcədən ATU-nun saytına yerləşdirilməsinə baxmayaraq, bəzi tələbələrin sənədlərində çatışmazlıqlar aşkarlanır. Universitetdə yaradılmış ciddi nəzarət sayəsində bu cür məsələlərin yoluna qoyulmasında tələbə adını qazanmış abituriyentlər və onların valideynlərinə lazımi məsləhətləri verilir.
Sənədlərin qəbulu avqust 25-dək davam edəcək.