Bakı, 22 avqust, AZƏRTAC
Əmək və Əhalinin Sosial Müdafiəsi Nazirliyi tərəfindən və Dünya Bankının maliyyə dəstəyi ilə həyata keçirilən “Məşğulluğa dəstək layihəsi” çərçivəsində təşkil edilmiş “Həvəsləndirmə və Biznes Mükafatı” müsabiqəsinin bir qrup iştirakçısı ilə görüş keçirilib.
Nazirliyin İctimaiyyətlə əlaqələr şöbəsindən AZƏRTAC-a verilən məlumata görə, Kiçik və Orta Biznesin İnkişafı Agentliyinin (KOBİA) Gəncə KOB İnkişaf Mərkəzində müxtəlif zərflər üzrə aktivlər almış benefisiarlarla keçirilən görüşdə “Məşğulluğa dəstək layihəsi”nin koordinatoru Fəqan Əsgərov, layihənin milli texniki məsləhətçisi Vüsal Mirzəyev, Gəncə KOB İnkişaf Mərkəzinin rəhbəri İlkin Dövlətov və başqaları iştirak ediblər.
Benefisiarlara layihə çərçivəsində həyata keçirilən əlavə dəstəkləyici tədbirlər, cari müsabiqənin bundan sonrakı mərhələləri haqqında məlumat verilib, iştirakçıların sualları cavablandırılıb. Həmçinin KOBİA-nın sahibkarlara göstərdiyi dəstək mexanizmləri diqqətə çatdırılıb. Gəncə KOB İnkişaf Mərkəzi tərəfindən müsabiqə iştirakçılarına göstəriləcək dəstək tədbirləri də qeyd olunub.