Bakı, 18 iyul, AZƏRTAC

İcbari Tibbi Sığorta üzrə Dövlət Agentliyi tərəfindən Məlhəm Beynəlxalq Hospitalına mediatur təşkil olunub. Mediaturun məqsədi media və qeyri-hökumət təşkilatlarının nümayəndələrini agentliyin müqavilə bağladığı özəl tibb müəssisələrində icbari tibbi sığorta sisteminin tətbiqi ilə tanış etmək və pasiyentlərin sığorta sistemindən istifadəetmə prosesini izləmələrinə imkan yaratmaqdır.
AZƏRTAC xəbər verir ki, səfər çərçivəsində mediatur iştirakçıları Məlhəm Beynəlxalq Hospitalında reanimasiya, əməliyyatxana, təcili tibbi yardım, laboratoriya, radiologiya, kardiologiya, poliklinika, qadın xəstəlikləri və doğum şöbələrində olublar. Hospitalın icraçı direktoru Sevda Əlizadə mediatur iştirakçılarına xəstəxanada icbari tibbi sığortanın xidmətlər zərfi çərçivəsində göstərilən tibbi xidmətlər barədə danışıb: “Məlhəm Hospitalında icbari tibbi sığortanın tətbiqinə 2021-ci ilin avqust ayından başlanılıb. Göndəriş vasitəsilə hospitala icbari tibbi sığorta çərçivəsində tibbi xidmət almaq üçün müraciətlər əsasən ürək-damar cərrahiyyəsi, kardiologiya, oftalmologiya, travmatologiya, invaziv radiologiya, urologiya və s. tibbi sahələr üzrə olur.
İcbari tibbi sığorta çərçivəsində xəstəxanada 2022 və 2023-cü illər ərzində 1900-a yaxın cərrahi əməliyyat icra olunub. Bu cərrahi əməliyyatlar sırasında travmatoloji, oftalmoloji, ginekoloji, uroloji, neyrocərrahiyyə, invaziv kardioloji, invaziv radiologiya, endoprotezləşdirmə, ürək-damar sistemində aparılan əməliyyat və prosedurlar yer alır”.
Agentliyin Marketinq və ictimaiyyətlə əlaqələr departamentinin rəhbəri Aynurə Əhmədova bildirib ki, hospitalda ildən-ilə icbari tibbi sığorta çərçivəsində göstərilən tibbi xidmətlərin sayında artım müşahidə olunur: “2022-ci ildə hospitalda 433 tibbi xidmət göstərilib. 2023-cü ilin bu gününə olan göstəricilərə görə isə vətəndaşlar 6 min 354 tibbi xidmətdən yararlanıb. Tibbi xidmətlərin 2 min 286-sı ambulator, 4 min 68-i stasionar şəraitdə göstərilib. Qeyd edim ki, agentliyin məqsədi vətəndaşlar üçün tibbi xidmətləri əlçatan etmək, sığorta çərçivəsində daha çox xidmətdən yararlanmalarını təmin etməkdir. Agentlik dövlət tibb müəssisələrində göstərilməsi mümkün olmayan xidmətləri effektiv qurulan göndəriş sistemi vasitəsilə özəl tibb müəssisəsində də mümkün edir. Hazırda müqaviləli tibb müəssisələrinin sayı 126-dır”.
Mediatur iştirakçıları icbari tibbi sığorta çərçivəsində ürək-damar cərrahiyyəsi üzrə əməliyyat olunan vətəndaşı ziyarət edib, rəyini öyrəniblər.
Daha sonra media və qeyri-hökumət təşkilatlarının nümayəndələri hospitalda oftalmoloji müayinədən keçiblər.
Tədbir sual-cavab sessiyası ilə yekunlaşıb.